Beste Kollegas,
Ons het al dikwels gesels oor die belangrikheid van die fondasie vir leer wat van 0 tot 6 jaar gelê behoort te word. Dié fondasie vorm die basis vir alle verdere leer. Die Grondslagfase lê die grondslag vir alle verdere formele leer en is daarom aller belangrik en vorm deel van die Vroeë Kinderontwikkelingsfase, wat internasionaal van 0 – 9 jaar strek.
Die Grondslagfase vorm die belangrike fondament waarop ’n kind se toekomstige leer en ontwikkeling gebou word. Graad R tot 3 is ’n besondere belangrike tydperk waarin kinders die basiese vaardighede, kennis en houdings ontwikkel wat hulle gedurende hulle hele skoolloopbaan nodig het. Net soos ’n gebou ’n sterk fondament nodig het, het ’n kind ’n sterk leerfondasie nodig om later suksesvol te kan voortbou.
Tydens die Grondslagfase word kernvaardighede soos taal, luister, praat, lees, skryf, spelling, syfervaardigheid en probleemoplossing gevestig. Hierdie vaardighede vorm die grondslag vir alle verdere leer. ’n Kind wat byvoorbeeld nie voldoende leesvaardighede ontwikkel nie, sal later nie net in Afrikaans of Engels uitdagings ervaar nie, maar ook probleme ondervind om vrae in Wiskunde, Natuurwetenskappe en ander vakke te verstaan. Lees en taal is dus nie net vakgebiede op sigself nie, maar die sleutels tot toegang tot verdere kennis.
Goeie onderrig in die Grondslagfase gaan egter oor veel meer as akademiese vaardighede. Kinders moet ook leer om te konsentreer, instruksies te volg, probleme op te los, vrae te vra, saam met ander te werk en verantwoordelikheid vir hulle eie leer te neem. Sosiale, emosionele, perseptuele en motoriese ontwikkeling speel ’n belangrike rol in hierdie proses. Wanneer kinders selfvertroue ontwikkel en positief oor leer voel, is hulle meer geneig om nuwe uitdagings aan te pak.
Die kwaliteit van onderrig in hierdie fase is daarom van kardinale belang. Onderwysers moet kinders se ontwikkelingsvlakke verstaan en leergeleenthede skep wat betekenisvol, prakties en ouderdomsgepas is. Gereelde en deurlopende waarneming en ondersteuning help om leerhindernisse vroeg te identifiseer voordat dit groter probleme word.
’n Sterk Grondslagfase is uiteindelik ’n belegging in elke kind se toekoms. Wanneer die fondament stewig gelê word, kry kinders die beste moontlike geleentheid om suksesvol voort te bou op hulle kennis, vaardighede en potensiaal in die latere skooljare en daarna.
Groete!
Wilna van Rooyen.